Tutapataje kupona!!!!?

 “Fumbua Macho Ewe Msafiri wa Kwenda Mbinguni”

 

Watu wengi wamo katika makanisa mbalimbali wakifundishwa mafundisho ambayo hayathibitiki katika Biblia. Baadhi ya viongozi katika makanisa hayo wanafahamu vizuri kuwa wanapotosha kondoo wa Kristo, lakini kwa kutafuta faida na maslahi yao, huficha ukweli wa Mungu na kufundisha mapokeo ya wanadamu.

 Marko 7:7-8, “Nao waniabudu bure, Wakifundisha mafundisho Yaliyo maagizo ya wanadamu, Ninyi mwaiacha amri ya Mungu, na kuyashika mapokeo ya wanadamu.”

Kwa unafiki Biblia hutumika na huku imani zao zimesimamishwa kwa mwovu ibilisi. Kwa kufanya hivyo roho za mabilioni ya watu hupotea kila kukicha. Tena maandiko husema;

 Tito 1:16, “Wanakiri ya kwamba wanamjua Mungu, bali kwa matendo yao wanamkana; ni wenye machukizo, waasi, wala kwa kila tendo jema hawafai.”

Ndugu yangu mpendwa hebu leo tuchunguze japo kwa ufupi mafundisho mapotofu ambayo watu wengi wameyajengea imani. Kristo analo kanisa ambalo hakuna hata fundisho moja potofu linalopatikana humo. Kanisa hilo limejengwa kwenye msingi wa mitume na manabii na ni lenye kushika maagizo ya Mungu. Kanisa hilo hufundisha mafundisho ya kibiblia na kukemea upotofu kama ilivyo elezwa hapo chini.

Fundisho la ubatizo.

 Mathayo 28:19-20, “Basi, enendeni, mkawafanye mataifa yote kuwa wanafunzi, mkiwabatiza kwa jina la Baba, na Mwana, na Roho Mtakatifu; na kuwafundisha kuyashika yote niliyowaamuru ninyi; na tazama, mimi nipo pamoja nanyi siku zote, hata ukamilifu wa dahari.”

Agizo la Yesu Kristo ni kueneza injili na kuwabatiza wale watakao amini kuwa Yesu ni Bwana na mwokozi wa maisha yao. Ubatizo ni huduma ambayo watu tusinge leta mzaha kwa sababu kwa kukiri ubatizo sahihi ni moja ya sharti ambalo kwalo twaweza kuuona ufalme wa Mungu.

 Yohana 3:3, “Yesu akajibu, akamwambia, Amin, amin, nakuambia, Mtu asipozaliwa mara ya pili, hawezi kuuona ufalme wa Mungu.”

 Yohana 3:5, “Yesu akajibu, Amin, amin, nakuambia, Mtu asipozaliwa kwa maji na kwa Roho, hawezi kuuingia ufalme wa Mungu.”

Kigezo cha kwanza katika ubatizo ni kuamini. Pili ni lazima pawepo na maji. Je! Maji hayo ni ya namna gani? Je! Ni ya kwenye bakuli au ya mtoni, ziwani na baharini?

 Marko 1:4-5, “Yohana alitokea, akibatiza nyikani, na kuuhubiri ubatizo wa toba liletalo ondoleo la dhambi. Wakamwendea nchi yote ya Uyahudi, nao wa Yerusalemu wote, wakabatizwa katika mto wa Yordani, wakiziungama dhambi zao.”

 Mathayo 3:13, “Wakati huo Yesu akaja kutoka Galilaya mpaka Yordani kwa Yohana ili abatizwe.”

Kwa mantiki hiyo mpendwa ubatizo ni lazima uwe wa maji mengi na siyo kwenye bakuli yaani kunyunyiza kichwani. Pia anaye batizwa awe na uwezo wa kuamini. Kumbe sasa mtoto hapaswi kubatizwa kwa kuwa hajafikia fahamu za kuamini injili.Wale wanao tazamia Yesu arudi kuwachukua wanapaswa kuzamishwa ndani ya maji ikiwa ndio ubatizo sahihi ambao hata Kristo aliutumia.

Je! Ni kwa nini tunapaswa kuzamishwa ndani ya maji?

 Warumi 6:4, “Basi tulizikwa pamoja naye kwa njia ya ubatizo katika mauti yake, kusudi kama Kristo alivyofufuka katika wafu kwa njia ya utukufu wa Baba, vivyo hivyo na sisi tuenende katika upya wa uzima”

 Wakolosai 2:12, “Mkazikwa pamoja naye katika ubatizo; na katika huo mkafufuliwa pamoja naye, kwa kuziamini nguvu za Mungu aliyemfufua katika wafu.”

 1Petro 3:20-21, “watu wasiotii hapo zamani, uvumilivu wa Mungu ulipokuwa ukingoja, siku za Nuhu, safina ilipokuwa ikitengenezwa; ambamo ndani yake wachache, yaani, watu wanane, waliokoka kwa maji. Mfano wa mambo hayo ni ubatizo, unaowaokoa ninyi pia siku hizi; (siyo

kuwekea mbali uchafu wa mwili, bali jibu la dhamiri safi mbele za Mungu), kwa kufufuka kwake Yesu Kristo.”

Kwa maandiko hayo mpendwa kubatizwa kwa kuzamishwa ndani ya maji ni kukiri kuwa Yesu alikufa na akafufuka katika wafu. Na kukubali kunyunyizwa maji kichwani, ni kupinga Biblia kuwa Yesu hakufa nalo ni moja ya fundisho la mpinga Kristo. Kuna batizo nyingi kama vile kuruka moto, kunyunyiza maji kichwani na hata kuvuka bendera; batizo hizo ndugu yangu hazitambuliki mbinguni, ni ubatizo mmoja tu yaani kuzamisha ndani ya maji ndio unaothibitika kimaandiko ambao Yesu na mitume waliutumia. Ana heri yule ateteaye Maandiko Matakatifu kuliko yule ateteaye mafundisho ya mchungaji wake.

Fundisho jingine linalopinga Biblia ni la mwanadamu kuchukua mamlaka ya kumwondolea dhambi mwanadamu mwenzake. Kwa kufanya hivyo ni kutangaza kuwa Mungu hayupo. Viongozi wa madhehebu mengi huwalazimisha waumini wao kwenda kutubu dhambi mbele yao na kusema yote waliyokosa. Jambo hili liko kinyume na mpango wa Kristo wa kuukomboa ulimwengu kwa sababu watu wanaishia sasa kumwabudu mwanadamu badala ya Mungu Mwenyezi. Yesu anasema;

 Mathayo 11:27-28, “Akasema, Nimekabidhiwa vyote na baba yangu; wala hakuna amjuaye Mwana, ila Baba; wala hakuna amjuaye Baba, ila Mwana, na ye yote ambaye Mwana apenda kumfunulia. Njoni kwangu, ninyi nyote msumbukao na wenye kulemewa na mizigo, nami nitawapumzisha.”

 Isaya 1:18, “Haya, njoni, tusemezane, asema Bwana. Dhambi zenu zijapokuwa nyekundu sana, zitakuwa nyeupe kama theluji; zijapokuwa nyekundu kama bendera, zitakuwa kama sufu”

Ndugu yangu iwapo umekosa au una hatia ya kutenda dhambi usalama wako ni kupiga magoti na kutubu kwa Yesu Kristo siyo kwenda kwa mchungaji au kiongozi wako wa kanisa. Kanisa la Yesu ndilo pekee haliwezi kuruhusu mafundisho yasiyo ya kibiblia na liko tayari kukemea mafundisho yote yasiyotokana na neno la Mungu, hata wewe waweza kuwa mmoja wa kondoo halisi wa Kristo utakaefukuza giza la mafundisho maovu ikiwa utaifuata njia nyembamba.

Giza lingine la kiroho ni kuweka “wachungaji wa mishahara”. Ni kukosa wito wa kufanya kazi ya Yesu na kuweka wachungaji wa vyeo ambao kimsingi huja kwa kuhitaji maslahi na kupitisha mafundisho ya uongo na kuvutwa zaidi na mishahara na siyo mambo ya kiroho.

Maandiko yanasema;

 Yohana 10:12-13, “Mtu wa mshahara, wala si mchungaji, ambaye kondoo si mali yake, humwona mbwa-mwitu anakuja, akawaacha kondoo na kukimbia; na mbwa-mwitu huwakamata na kuwatawanya. Yule hukimbia kwa kuwa ni mtu wa mshahara; wala mambo ya kondoo si kitu kwake.”

Uovu huo husababisha hata kuwekwa kwa viwango vya zaka na sadaka na kuwalazimisha waumini watoe viwango hivyo vya pesa waingiapo katika ibada ili kukidhi mishahara ya wachungaji.

Ndugu yangu ni muda wa kujihoji, ikiwa kanisa ulilopo limekanyaga maandiko matakatifu au amri za Mungu kwa kufuata faida za kidunia, fanya hima utoke ujiunge na kondoo wa Yesu kabla muda haujakwisha maana Yesu anakuita ni vema kwako ukiitika.

Yesu yuko anabisha hodi katika mioyo yetu, ikiwa tutaisikia sauti yake tukakimbia maovu na kushika maagizo yake, basi tutakula mema ya nchi. Lakini tukishupaza shingo na mioyo na kuwasikiliza viongozi wa wakanisa (watu wa kupenda mishahara), ole iko juu yetu.

 Ufunuo 18:4, “Kisha nikasikia sauti nyingine kutoka mbinguni, ikisema, Tokeni kwake, enyi watu wangu, msishiriki dhambi zake, wala msipokee mapigo yake.

Neema ya Bwana Yesu na iwe pamoja nanyi nyote. Amina.

Habari zaidi kuhusu masomo haya;

Namba, 0758924982, 0714697526.

E-mail ndiku.live@outlook.com

Facebook; Mwl Ndiku.